Balada ò Gerce
Balada ò Gerce
na spòdlim historie pòdóny przez mòjégòTatã Zygmùnta
Swiat spùszcziwô smrokù gardinã
Psëskò òd wsë załaja zberkù
Sómny las je, nikògò ni ma
Nawetk ptôszka sã tu nie zmerkô...
Tak cëchùchnò jak w stôrim zarkù
Wiater niesmiało òdnąt-donąt
Sajdnie a lëstk côrniãti zadrżi
Jak mùlk młodi pierszą miłotą...
Szarôczk sarnë pòzérô òkã
Na drzéwiãta zdłuż stôri drodżi
Dalek widzec je sztôłt człowieka
Jidze z kòszã bëniel òdwôżny...
Nënka kôza drzewa nazbierac,
Co pòtrzaska wòjnë patrónë
Szczépë sëché. Jesz ni ma grzëba
Dôwno jagòdë wëzebróné...
Wezdrzôł w górã, dze bisząg przidczi
Przeszła zëmizna z górë krzéla
Nodżi stałë sã dzywno mitczé,
Sëna białka, co głowë ni mia...
###
Aùgùst całi dzéń w pòlu òrze
Gón arastny je jak Sahara
Zôs wëszczerzac bãdą sã lëdze,
Co fùl fórë nie dô zahalac...
Chłop pòpijô klapsztulã mòkã
Kònie w lasu mërlënã skùbią
Przeńdze wòjna tą razą bòkã?
Jak ny Niemcë kónrowac lubią...
Mało bëło zarabczëc Pòlską?
Hitler Pariż zwiedzył paradno
Za czim w zëmie tromòlëc wòjskò
W ruską, mrozną kùrzatwã zdradną...?
Ach, na mòja biédnechnô Gerta
Wnetkã rok mdze, jak je zaległô
Dzéń w dzéń mùszã ji mieniac pierznã
Co jesc łëżką dóm - to wërzëgô...
Òb noc krzëczi, głosno jamrëje
Le nie jidze zrozmiôc chòc słowa
Widzec je, co mòckò jã bòli
A òd tegò zaszło ji w głowã...
Jinô ba w trzëdzestim dzewiątim
Chëcze łiszcza blôskã ji krôsë
Przëszedł lëst zez wschòdnégò frontu
Nasz Franuszk zabiti: erschossen...
Dzéń za dniã drãżészi jadłobą
Białka stała sã swòją cénią
Nie pòradzã - dôł pòkù doktor
Z czasã mòże bëc - to ji minie...
###
Gerta, Du bist mein kleiner Schätchen
Tak cã kòchóm, jaż zmiéróm całi
Komm, pùdzemë so përznã tanzen
Móm dlô ce darënk nié-małi...
Francu, Du bist verück, jak wiedno
Taczi medalión kòsztô w groma
Miłosc mia zjiscenié niejedno
Gerta sã wnetk niesama zrobia...
Niemca nie wezniesz! - rzeklë starszi
Naczków Gùst je spòsobny, gbùrstwò
Dostónie. To wama wëstarczi
Tamùj przedërchôsz kòżdé zjąstwò...
Franc wëpòrajił sã do Szwabie
Nie òdzéwôł sã, nie napisôł
Wzãła tej Gùsta, krótkò zbawia
A ju Franuszk w kòlibce piszczôł...
###
Szczepanie, wezniesz òprzëpôłnim
Białkã mòjã wëwleczesz z wërów
Tam, na pòdwòrzu jã zabijesz
Scyrz ji cësniesz w błotkò z kamieniã...
Szedł parobk, naòstrził seczerã
Cygnie jã na kloc do rãbieniô
Béł òn nôłożen Lachiv rezat,
Bò z Wòłinia Niemc gò wëgònił...
Grzimnął rôz i Gerta je sztiwnô
Głowa kùlna sã zadzëwionô
Òn òdkòpnął w sztok jã i gwizdnął,
Czedë w jôłsze ba ùtopionô...
Wiôldżi kam ùrzesził do nodżi
A zakarowôł w kùlã w kòpli
Jesz so przë tim nogówkã zmòcził
Niglë warcył - bëło ju wëschłé...
###
Lëdze gôdają, że przesprawã
Nie bëła jima zabôczonô
Gùst z parobkã mielë rozprawã
Kara smiercë ba zasądzonô...
Jiny Naczkòwim gòspòdarzą
Las je rzôdszi dzél z kòżdim rokã
Jesz tej-sej tam takcos sã zdarzi
Że cos z lasu wińdze na drogã...
Próżno szukô, chto w noc to pòtkô
Òczów zdrzeniô, gãbë czë nosa
A ùrzasnie sã tej nié-letkò
Bò le cemnosc tam je, dze głowa...
Gerta je na òbzórczi wëszłô
Pòtkôł jã niejeden, niejedna
Chce sã pòdzelëc swim nieszczescã
Mòże cebie prawie so wëbra...?
Tómk Fópka, Chwaszczëno, 5 zélnika 2022 rokù, gòdz. 10.27 p.p.