Pòliptik na rozestanié
Pòliptik na rozestanié
Rzeknąc "Do ùzdrzeniô"
Tej lepi nie gadac nick
Kò to je rozestanié
Na wiedno...
Za czim głosu dërgòtanié
Òczów mòkrzenié
Prosto - wińdze
Bez słowa...
Jednym côrniãcym
Wëszmërgiwóm Ce
Z mòjégò
Cyberrëmù...
Pòmału z Cebie
Robisz sã tobą
Jedną taką
Nikògùm...
###
Czëjã:
Serca bòlenié
Dëszë skòlenié
Magù szôlenié
Cała cerzpienié...
Ùszłë:
Lopk wzdichnieniô
Gëldzenié zdrzeniô
Słowa pòdskôceniô
Gòrącosc dotknieniô...
Të:
Nie kòchôsz
Nie słëchôsz
Nie wzérôsz
Zabijôsz...
###
Zamieniã nasze sztótë
Na radia szemarzenié
Na wanożné bótë
Na lëstk, co strëgą płënie...
Bãdą mie òne
Jak słodkô legùmina
Jak cepło pierzënë
Jak bùrzô, co mina...
Zapiszã w pamiãcë
Ùsmióné òczë
Dobré rãce
Smiecë, smiecë, smiecë...
###
Piszesz, a kòżdô
Lëtera pôli
Szczestlëwi drodżi
Złégò nie wezną...
Kamienie - kropczi
Cyskôsz pò całim
Alfabét krwawi
Wëkrziknik głosny....
Biliet do cyrkù
Pierszé kùszkanié
Òstatné zdanié
Spier... - łzą namikłé...
###
Czedë sã zamknãłë dwiérzë wseczëcô
A pòmión słowów zachrapiôł kòchaniô
Mùlkòwé spiéwë zwëczajnoscë przecąg
Wëwiôł. Czëc wieczné je òdpòcziwanié...
Tómk Fópka, Chwaszczëno, 15 maja 2022 rokù, gòdz. 12.28