Balada ò jednym bòjsë
Balada ò jednym bòjsë
Chtëż to w zelonym tak żgô jagùarze?
Pòłikô dargã jakno nudel szarą?
Pewno chtos młodi na wrëje dze jadze
Drist, cobë z mùlką bëc chùtuszkò, zarô...
Hewò na przédnym sedzenim są kwiatë,
Co je zamówił kòl "Tulpë Francuszë"?
Je, wejle, z bómkama tuta; zapłacëc
Trzëdzescë zet òsmë z pòdatkã mùszôł...
To pewno dô co za taczé staranié
Krew zagòtowa sã w żëłach jak zupka
Ju widzy z dzéwczëcã sã przëcywianié
I cało całé: òd lëpk jaż pò... ùszka...
Nëkô bez lasë, przék rëgnãłë zajce
Òd mòtorowégò ùrzasłé wëcô
Widama maklô wcyg cemniészé plachce
W ùchò go gëldzy òb-jazdowi przecąg
Z rutë niedomkłi, bò mùsz łokc wësënąc;
Drëdżé zajãté z głosników mùzyką
Z pòjugą dóną dwasta decybelóm...
Bòkã jidący bë gwës z gòrzã wzdichnął:
- A żebë wzãła parala gò, groma,
Za taczé w lasu trzôskòwanié w nocë;
Za kòżdą plëtã, co mô rozprisnioné -
Niech le nen rozblek nie léze na òczë!
Timczasã w samim nôgãscészim bòrze
Stanãło aùcëskò, nie rëszô z môla;
Wdostôł sã grëbi midzë kòła kòrzéń -
Wszëtka sã z bakù benzyna wëlała...
Czedë nawetkã nie zbiegło kropelczi,
Zgasła maszina, je zëmno a cemno;
Bòjsa wëkraglôł sã, pòzamknął dwiérczi;
Wzął sã rozezdrzôł, rôz szpetno przeklnął
A w miesądza dôwô kraczaje stronã.
W rãcëskù jednym trzimie krutã z tutą;
Drëgą przed sebie mòckò wëprosconą
Robi so stegnã w smrok, a za nią bótã
Gruńt badérëje, niglë stąpnie dali.
Mòklëzna miészò sã z łzama zwątpieniô:
- Za czim na skrótë sã pùscył, në, za czim?!
Tej-sej mù wietew w łësënã zazwònia...
Narôz, czej strach gò béł wzął na mòdlenié -
Switk malëtëchny rozprzeniósł sã płomã.
Skòcził jak jachtą spłoszony miks jeléń;
Bómcëska wëpadłë prosto pòd nogã...
Cygnie do widkù jak mòra do lampë;
Kwiatë dzes w czerzu sztopòrczą zdzëwioné...
Jesz prosto sto métrów a trzë zôkrãtë -
Zakùknął do chëczë wãdrówc zòchlony...
Òkno malinczé a z niegò łysk słuńca
W jizbie starëszka cos warzi w gropùszkù
Zmerkała chłopa, kôże rãką weńsc mù
Wlôzł. - Dobri wieczór - a białka są ùsmia
Przë tim trzë zãbë wanodze pòkôza
- Chtëż to sã tuwò cësnie òb cemnicą?
Tak-cos sã dôwno, dolëbóg, nie zdôrza,
Taczégò bëńla nie nańdzesz ze swiécą!
Kôzała na stółkù sadnąc przë stole
Dała ptôszé mléczkò, chleba a gùrkã
Czej òn przëgrizôł, òna jemù kroja
I zachrapiałô ną nóca lefórkã:
- Nasze pùtawë tak dalek òd lëdzy
Nawetkã sztrómù nie nalézesz wcale
Rôz, bôdôj w zëmie, w szescdzesątim drëdżim
Cëzé bëło wòjskò ùtchnioné w kale.
Lëdzëska lasny wnetk jich òdkòpalë
Same dzyrsczé chłopë, jak malowóny
Wòdą wëszlapac gãbë, nodżi, paje
A ju jeden béł z jedną stądka zdóny...
Sã nie naceszëlë drëszstwã za dłudżim.
Rozkôz: co chërã mają sprawic nową.
Labòratorium ùsadzëlë w dżągli
I pòszëdło wëszło, co zwią je kòwid...
- Wëdżinãlë wszëtcë zez pùstków chiżo,
Leno jedna jem òstała przë żëcym...
Òdtądka ludk sã niżóden nie zbliżôł
Do mòji môłi përdëgóńsczi chëczczi...
- Wëpijkôj, chłopkù, gòrący harbatczi
Skórno jes do mie szczestlëwie przëturził
Jô przërëchtëjã cë w łóżkù do spatkù
Witerkò nazôdkã do swiata pùdzesz...
Pije a cepło mù wléwô sã w człónczi
Pòwieczi - jakbë gardinë zacygôł
Lubkò a mitkò, i taczi je spiący
Białka pòmału nóż w górã zadwigô...
Jak nie wëskòczi! Jak òn nie wësadzy!
Wëfruwnął w sekùńdze spik jak szãtopiérz
Zdrzi. Ni ma białczi trzëzãbny ju wiãcy
A zãberwajka stolëmno sã trôpi:
- Chłopie, co të mie za pòmstwò narobił!
Tak zemglôc narôz bez żódny przëczënë!
Terô òdkùpic je nót statczi nowé
Kò enefzet te nie pòszpandérëje!
Knôp flot zapłacył, co mùszôł, ze wstëdã;
Wëbùrknął bùtenkù, to le zgrochòta;
Na szëji pòprawił so z grifã czedã
I wsadnął w zeloną swą wëszcziglëtã...
Tómk Fópka, Chwaszczëno, 21 gromicznika 2022 rokù, gòdz. 9.07 p.p.