Pierszô wòda
Pierszô wòda
Jedze, jedze straż ògniowô
Łiskô widã, głosno trąbi,
Bò sã pôli hibridowô
Wójtowa Toyota kòmbi...
Wòdë spùscëlë pół błotka
A to zgasnąc nie chce wcale
Piôskù sëpnãlë wiwrotkã...
Sztuczné robią òddichanié
Wójtowi. Sã biédôk zatchnął
Dëmã z technicznégò cëdu
Zbiszk mù lëpë-lëpë z Jarkã
Robią, bò jaż całi zmòdrzôł...
Pózni gasëlë sztëk r'zëska,
Co je żiwcã wzął, pòdpôlił
Gbùr, co jegò zbòża nie chca
Kùpiwac agencja rolnô...
Jesz do kòta ba wezwanié,
Co wtromòlił sã na drzewò
Bleczôł, żdżąc na zmiłowanié
Sã wësokòscë pùjk bòjôł...
Ju bezpieczno jadą nazôt
Ùmãczony, wëczapóny
Zëmné pôłnié mùszi zagrzôc
A kąsk nocë miec przespóné...
Witro, narôz zôs syrena
Jich zawòło pò trzë razë
Jak w nym rozwarkù mdą gòniec
Nôleżnicë naszi strażë.
Czedë wezwie jich do nieba
Bòg-Kòmeńdant nônôwëższi
Tej niejedna pùdze wòda
Mòkri znak achtnieniô zemsczi.
Tómk Fópka, Wejrowò, 22 séwnika 2023 rokù, gòdz. 4.33 p.p.