Laudacja Eugeniusza Pryczkowskiego - Ryngrafy Witosława 2024
Laùdacjô Eùgeniusza Prëczkòwsczégò z leżnotë przëznaniô Ringrafù Witosława
Nicht nie lëdô zmùdë, jimrë
Wnet bë zéwac chca pùblika
Temù krótką wiérztą dôjta
Wëtłómaczëc Genków Ringraf:
(...)
Jak pòchwôlëc móm, dolëbóg
Człowieka, co jegò dzeła
Nie są na disk do zmiesceniô
I stolëmnô je jich sëła
Mùszôł bë chòc wspòmnąc skrómno
Rédżi ksążków, filmë, spiéwë
Zrzeszeniową prôcã trudną
Samòrządzënowé niwë
A dlô gazétów robòtã
Sta historiów spisywanié
Na wiesoło, jak przë "Szpòrtach"
Smùtno - wòjnë przeżiwanié
"Rodną zemiã" a programë
Jiné, w jinëch gróné stacjach
Dze na spiéwno i z dzôtkamë
Béł ùczony jãzëk z pasją
Wëdôł sta brëkòwnëch rzeczi
I na papiorze, zwãk, nótë
Tej-sej òd zabëcô retôł
Tam-sam wëpchnie trimnëch bùten
Mszë kaszëbsczé dzãka Niemù
Rãcë dostałë a nodżi
Mòdlëtewnik a lekcjónôrz
Wiérnëch mòdlëtwë dołożił
Wiedno czëni jaczis pòrëch
Bò Òn nie je do miniãcô
Młodi sã kòl Nie zebrelë
A przëbiwô jich wcyg wiãcy
Kò je szkólnym, jaczëch mało
Znô kaszëbiznã, znô lëdzy
Wiédzą dzeli sã wëtrwało
W telewizji, w internece
Na Kaszëbsczi Akademie
Kòżdi naléze co dlô se
Frantówczi do naùczeniô
Czësto brzëmią karnów głosë
Jegò tekst wzlecy mòtilkã
A pòwrócy dzérsczim grifã
W kòżdim mądroscë përzinkã
Przëprawioné czasã fifã
Przidką stegną nôùkòwą
Jidze, chòc Mù wiater zëmny
Chcôł doktorat z głowë wëwiôc
Òn nie bòji sã procëmnych
Co jich napòtkô na drodze
Jak ne Remùsa ùkôzczi
Co Mù towarzą w wanodze
Przék jim stôwiô cnotë Bòsczi:
A nôpierszô z nich je miłosc,
Do òjczëznë, do Kaszëbsczi
Je ji tëli, co w Baninie
Gwës sã nie je w sztãdze zmiescëc
Nôdzejã na przedërchanié
Pòkrok, tak na sto kraczajów
Bë za tësąc lat swiat całi
Jesz sã kaszëbiznë najôdł
Wcyg je wiara na dobëcé
Rzekną mòże: rozëm kaczi
Jesz dzecyjné nasze dzecë
Strzód wësziwów a tobaczi
Bãdą czëtac pò kaszëbskù
Spiewac snôżo w mòwie rodny
Bãdą pò kaszëbskù mëslec
A wcyg bãdą jesz ji głodny
(...)
Pewno pòzwą Twòjim mionã
Jaką szkòłã, czë szasëją
Wôżné je, co Twòje słowa
W Twòjech dokôzach przeżëją!
Tómk Fópka, Chwaszczëno, 23 maja 2024 rokù, gòdz. 7.25 d.p.